Fjórtándu umferð í Bónusdeild kvenna lýkur í kvöld þegar Ljónynjurnar mæta Grindavík í HS-Orku höllinni úti í Grindavík. Viðureign liðanna hefst kl. 19:15 en aðeins tvö stig skilja liðin að í deildarkeppninni, grænar og vænar á toppnum með 20 stig en Grindavík í 3.-4. sæti með 18 stig.
Liðin mættust í lok októbermánaðar í deildarkeppninni þar sem okkar konur höfðu eins stigs sigur í spennuslag 85-84. Það er von á ekki síðri skemmtun í kvöld og hvetjum við alla Njarðvíkinga til að gera sér ferð til Grindavíkur og styðja okkar konur til sigurs.
Með kvöldinu í kvöld eru fimm leikir eftir af hefðbundinni deildarkeppni áður en deildinni verður skipt upp í A og B hluta. Því eru 10 stig í pottinum fyrir okkar konur að vinna með áður en skipt verður upp.
Næsti leikur eftir kvöldið í kvöld er heimaleikur gegn Keflavík, svo útileikur gegn Hamri/Þór, heimaleikur gegn Ármanni og útileikur gegn Haukum í síðustu umferð deildarkeppninnar.
Áfram Njarðvík!
