Einar Árni verður tæknilegur ráðgjafi yngri flokka
Bruno Richotti er nýr yfirþjálfari yngri flokka UMFN og Einar Árni Jóhannsson verður honum til halds og trausts sem tæknilegur ráðgjafi yngri flokka. Bruno og Einar taka við af Loga Gunnarssyni sem nú lætur af störfum sem yfirþjálfari eftir 10 ára starf fyrir félagið.
„Logi hefur verið vakinn og sofinn yfir starfsemi yngri flokka hjá okkur í áratug og nú í ársbyrjun þegar ljóst var að hann myndi venda sínu kvæði í kross hófst leitin að nýjum yfirþjálfara. Við höfum verið einstaklega lánsöm með gæði í þjálfun hjá félaginu í gegnum tíðina og Bruno var mikill happafengur fyrir félagið á sínum tíma. Við erum því ánægð með að fá Bruno og Einar saman í forsvar fyrir okkar ört vaxandi starfsemi en liðlega 20% aukning var á iðkendum í körfubolta hjá Njarðvík þetta tímabilið,” sagði Anna Hulda Einarsdóttir varaformaður Unglingaráðs Njarðvíkur.
Eins og áður greinir þá er Logi að láta af störfum eftir 10 ára vakt í stöðu yfirþjálfara og kann Unglingaráð honum bestu þakkir fyrir sitt framlag til yngri flokkanna. Störf Einars og Bruno hefjast undireins enda er skipulag á sumarstarfi deildarinnar í vinnslu og undirbúningur fyrir næstu leiktíð þegar hafinn.
Velkomnir til starfa Bruno og Einar!