Bikarmeistarar Njarðvíkur hafa bætt við sig landsliðskonunni Danielle Rodriguez sem á síðustu leiktíð lék erlendis sem atvinnumaður. Körfuknattleiksunnendur hérlendis ættu að þekkja til Dani eins og hún er oft kölluð enda sett góðan svip á íslenska boltann síðustu ár. Dani er nú komin heim og semur við Njarðvík til næstu tveggja ára.
Þarna er á ferðinni frábær leikmaður, mikill karakter og ekki síður öflugur þjálfari en staðfest er að Dani muni einnig taka við nokkrum yngri flokkum í þjálfun á komandi tímabili. Hún hefur þjálfað víða og m.a. fyrir KKÍ hjá yngri landsliðum Íslands.
„Við erum vissulega að gera taktíska breytingu á meistaraflokki kvenna með þessari ráðningu. Dani er þekkt stærð í íslenska boltanum og við í Njarðvík stefnum áfram á framfarir og baráttu meðal þeirra bestu,“ sagði Einar Jónsson formaður Körfuknattleiksdeildar Njarðvíkur.
„Hér erum við ekki einungis að fá frábæran leikmann heldur einnig einstakling sem er fær um að gefa vel af sér í allt starfið okkar. Hún er líka öflugur þjálfari og iðkendur félagsins munu njóta góðs af því. Kvennaliðið okkar er ríkjandi bikarmeistari og silfurlið Íslandsmótsins og því er það efst á dagskrá að byggja ofan á öflugt tímabil. Við vitum hvað Dani kemur með að borðinu og erum mjög spennt að hefjast handa með hana innan okkar raða,“ sagði Einar Árni Jóhannsson þjálfari meistaraflokks kvenna hjá Njarðvík.
