EM í klassískum kraftlyftingum öldunga í Oulu í Finnlandi hélt áfram í dag og hóf Jens Kristinsson keppni snemma í morgun en hann keppir í -105 kg flokki M3.
Jens opnaði með 155 kg hnébeygju en missti jafnvægið og náði ekki að klára. Hann mætti fílefldur tilbaka og tók 155 kg örugglega. Í þriðju hnébeygjunni hækkaði Jens um heil 22,5 kg í 177,5 kg sem var tilraun til 5 kg persónulegrar bætingar. Jens kláraði lyftuna svo sannarlega glæsilega.
Í bekkpressu opnaði Jens með fislétt 100 kg. Í annarri lyftu var hækkað í 107,5 kg sem fóru þægilega upp. Jens reyndi síðan við persónulega bætingu í þriðju lyftu með 115 kg en þau fóru ekki upp að þessu sinni.
Í réttstöðulyftunni opnaði Jens með 192,5 kg á stönginni. Jens hækkaði um 15 kg í næstu lyftu og kláraði 207,5 kg örugglega og 2,5 kg persónuleg bæting. Í lokalyftunni reyndi Jens við 212,5 kg en náði ekki að klára lyftuna. Samanlagður árangur varð 492,5 kg sem er 7,5 kg persónuleg bæting.
Innilega til hamingju með mótið og bætingarnar, Jens.