Helena Rafnsdóttir hefur samið við Njarðvík fyrir komandi tímabil í Bónusdeild kvenna. Helena hefur síðustu ár dvalið við háskólanám í Bandaríkjunum en er nú á leið aftur heim.
Helena var burðarás í Njarðvíkurliðinu þegar kvennaliðið varð meistari 2022. Að því tímabili loknu hélt út út til náms í Bandaríkjunum. Heimasíðan náði tali af Helenu í dag og spurði frétta:
Hvernig líst þér á að vera að koma aftur heim í Njarðvík?
Mér líst mjög vel á það. Það er margt nýtt og spennandi í gangi í Njarðvík sem ég er mjög spennt að verða partur af. Það hefur verið gaman að fylgjast með hvað klúbburinn hefur stækkað og breyst mikið síðan ég var þarna fyrir 3 árum. Nýja aðstaðan er gríðarlega flott og ég hlakka mikið til að spila þar fyrir fullu húsi áhorfenda.
Fylgdist þú vel með liðinu á síðasta tímabili?
Ég fylgdist eins vel með og ég gat, hvort sem það var stat-ið eða í sjónvarpinu, sérstaklega bikarúrslitaleiknum og úrslitakeppninni. Það var virkilega gaman að sjá liðið standa sig svona vel í vetur, vinna bikarinn og vera svo nálægt því að taka Íslandsmeistaratitilinn líka. Úrslitaserían var geggjuð, þrátt fyrir úrslitin. Það er margt gott sem er hægt að taka úr henni og tímabilinu í heild og byggja ofan á fyrir næsta tímabil.
Þínar væntingar til hópsins og næstu leiktíðar?
Síðustu tímbil hafa sett ákveðinn standard fyrir næsta tímabil. Hópurinn verður aðeins öðruvísi og við munum líklega spila aðeins öðruvísi bolta en síðastliðinn vetur. Ég tel okkur vera með flottan og fjölbreyttan hóp af reynslumiklum og efnilegum leikmönnum. Með þennan hóp, ásamt góðu þjálfarateymi er markmiðið auðvitað að landa íslandsmeistaratitlinum næsta vor.
