Hin sænska Pauline Hersler snýr aftur í IceMar Höllina á næstu leiktíð en hún hefur framlengt samningi sínum við Njarðvík. Hersler kom til Njarðvíkur á miðri síðustu leiktíð og setti strax sitt mark á leik liðsins. Hersler var með 22,3, stig, 8,2 fráköst og 2 stoðsendingar að meðaltali í leik á síðasta tímabili.
„Ég er mjög spennt fyrir því að koma aftur í Njarðvík því ég naut mín vel hjá félaginu á síðustu leiktíð, bæði innan og utan vallar. Ég er einnig spennt fyrir því að byggja ofan á það verk sem við hófum á síðustu leiktíð og berjast fyrir markmiðum okkar í liðinu. Þá var það ánægjulegt hvernig starfsfólk, liðsfélagar og stuðningsmenn voru opin og innileg svo ég er þakklát fyrir að vera á leið aftur inn í jafn frábært umhverfi. Get ekki beðið eftir að hitta alla á nýjan leik,” sagði Hersler í snörpu samtali við UMFN.is