Hugi Hallgrímsson leikur í Njarðvíkurbúning á næstu leiktíð en þessi 24 ára gamli framherji samdi við Njarðvík í dag. Hugi lék á síðustu leiktíð með Haukum í 1. deild karla þar sem hann var með rúm 15 stig að meðaltali í leik.
Hugi lét fyrst að sér kveða í meistaraflokki með Vestra á Ísafirði en hann hefur m.a. leikið með Stjörnunni og Haukum. Fyrir þá sem elska góðar vísbendingar um Pub Quiz spurningar þá er Njarðvík ekki fyrsta Suðurnesjaliðið sem Hugi leikur með því hann á að baki einn leik með Þrótti Vogum tímabilið 2023-2024.
Hugi var eins og áður segir með rúm 15 stig að meðaltali í 1. deild karla á síðustu vertíð en auk þess með 6,8 fráköst og 2,7 stoðsendingar að meðaltali í leik.
„Ég er virkilega ánægður að fá Huga til okkar. Hugi átti mjög flott tímabil með Haukum í 1.deildinni og ég held að hann sé tilbúinn til þess að taka næsta skref í Bónus deildinni.
Sem leikmaður og karakter tikkar Hugi í boxin sem við erum að leitast eftir – hann er fjölhæfur leikmaður sem getur leyst mismunandi hlutverk og kemur með aukna stærð inní okkar íslenska kjarna,“ sagði Rúnar Ingi Erlingsson þjálfari Njarðvíkurliðsins við undirskriftina í dag.
Mynd/ Hugi ásamt þjálfurunum Rúnari Inga og Loga og formanninum Hafsteini.