Barna- og unglingaráð Körfuknattleiksdeildar Njarðvíkur hefur ráðið Jóhann Árna Ólafsson sem annan af tveimur yfirþjálfurum yngri flokka félagsins. Jóhann mun stýra 12. flokki karla á næstu leiktíð ásamt því að sjá um morgunæfingar.
Jóhann og Bruno Richotti munu skipta með sér hlutverkum í yfirþjálfarastöðum félagsins þar sem Jóhann verður yfirþjálfari drengjamegin og Bruno stúlknamegin.
Stjórn Barna- og unglingaráðs er einkar spennt fyrir samstarfinu við Jóhann sem m.a. var að þjálfa við morgunæfingar félagsins í vetur og þá liðsinnti hann einnig við þjálfun í forföllum annarra þjálfara.
„Nú fáum við Jóhann inn af fullum krafti í starfið en við Njarðvíkingar þekkjum auðvitað vel til leikmannaferils hans og þá hefur Jói einnig getið sér mjög gott orð við þjálfun yngri flokka,“ sagði Guðni Sigurbjörn formaður unglingaráðs Njarðvíkur.
Flestum Njarðvíkingum er auðvitað kunnugt um Jóhann sem lék upp alla yngri flokkana í Njarðvík og síðar með meistaraflokki félagsins. Á síðustu árum hefur verið lagt í mjög metnaðarfulla vegferð með starf yngri flokka félagsins og er ráðning Jóhanns enn einn liður í að búa til öflugt umhverfi fyrir iðkendur í Njarðvík.
Mynd/ JB: Jóhann og Guðni Sigurbjörn búnir að handsala samstarfið og klárir í bátana.