Njarðvík er VÍS-bikarmeistari kvenna 2025 eftir frækinn spennusigur gegn Grindavík í úrslitaviðureign bikarsins sem fram fór í Smáranum í Kópavogi. Lokatölur 81-74 þar sem Brittany Dinkins var valin besti leikmaður úrslitaleiksins með stórglæsilega þrennu, 31 stig, 10 fráköst og 10 stoðsendingar.
Þegar allt var í járnum kom Emilie Hesseldal með eina stærstu körfu leiksins þegar hún skellti niður þrist og jók muninn í 78-73 fyrir Njarðvík og fór það langt með leikinn. Hesseldal var einnig með magnaða tvennu en hún gerði 14 stig í leiknum og tók 20 fráköst.
Pauline Hersler fór rólega af stað í leiknum en í síðari hálfleik fann hún heldur betur fjölina, lauk leik með 25 stig og 9 fráköst og þá voru þær Hulda, Sara og Lára allar með 3 stig.
Annar bikartitill kvennaliðs Njarðvíkur í sögunni staðreynd en liðið varð fyrst bikarmeistari árið 2012. Til hamingju Njarðvíkingar og kærar þakkir fyrir stórglæsilegan stuðning í Smáranum.
Hér að neðan má nálgast helstu umfjallanir um bikarsigurinn:
VF.is: Njarðvík bikarmeistari kvenna eftir sigur gegn Grindavík
Karfan.is: Njarðvík VÍS-bikarmeistarar kvenna 2025
RÚV: Njarðvík er bikarmeistari í annað sinn
MBL.is: Njarðvík er bikarmeistari í annað sinn
Vísir.is: Njarðvíkingar bikarmeistarar
Mynd/ Gunnar Jónatansson