Njarðvík leikur til VÍS-bikarúrslita í dag gegn Stjörnunni en liðin mætast kl. 19:45 í Smáranum í Kópavogi. Ekki mátti miklu muna að okkur tækist að hafa tvö lið í úrslitum þar sem Ljónynjurnar töpuðu naumlega gegn Fjölni í undanúrslitum.
Leikur kvöldsins verður sautjándi bikarúrslitaleikur félagsins í sögunni en keppnin hófst 1970 og Njarðvík lék sinn fyrsta bikarúrslitaleik árið 1976 gegn Ármanni. Ármenningar höfðu betur það árið 98-89 en fyrsti titill okkar í bikarnum kom í hús árið 1987 eftir 91-69 sigur gegn Haukum.
Njarðvík hefur leikið næstoftast til bikarúrslita allra félaga í landinu eða 16 sinnum og í kvöld fer sautjándi leikurinn í bækurnar. Vinningshlutfallið í úrslitaleikjunum er 50% eða 8-8.
Aðeins tvö félög hafa ekki tapað bikarúrslitaleik en það eru andstæðingar okkar frá Garðabæ, Stjarnan, sem eru á 5-0 „rönni“ í bikarúrslitum og svo Fram sem unnu sinn eina bikarúrslitaleik sem þeir spiluðu árið 1982 þegar þeir unnu KR 68-66.
Eins og mörgum gæti verið kunnugt um þá er þetta bikarkeppnin frá síðustu leiktíð. Vegna heimsfaraldurs COVID-19 var ekki hægt að ljúka bikarkeppninni á síðasta tímabili og því ákveðið að hafa hana fyrir komandi leiktíð 2021-2022.
Við hvetjum alla Njarðvíkinga til að mæta í grænu á leikinn í kvöld og hefur stjórn deildarinnar þegar hafið sölu á bikarbolum. Fjöldi fólks kom í Ljónagryfjuna í gærkvöldi og tryggði sér bol en hægt verður fyrir áhugasama að tryggja sér bol á leikstað. Þá er miðasala fyrir leikinn í kvöld inni á Stubbur-app og ráð að tryggja sér miða sem allra fyrst þar sem báðum liðum er úthlutað takmörkuðu magni miða á leikinn.
Leikur kvöldsins verður í beinni á RÚV2
#ÁframNjarðvík
Við styðjum Njarðvík:
