Njarðvík hefur samið við Sofia Roma, 29 ára miðherja sem er leikmaður í landsliði Púertó Ríkó og er einnig með ítalskt vegabréf. Sofia er 188 cm á hæð. Sofia lék í háskólaboltanum í Bandaríkjunum þar sem hún er fædd og hefur alið manninn. Þá lék hún með liði Púertó Ríkó á Ólympíuleikunum í París 2024.
Sofia var fyrstu tvö árin í Wagner og færði sig svo til Duke þaðan sem hún útskrifaðist árið 2019. Sîðan hefur hún leikið sem atvinnumaður á Ítalíu, í Sviþjóð, á Spáni og í Púertó Ríkó þar sem hún lék síðast (deildin þar spilast frá ágúst og fram í nóvember). Hún og Paulina Hersler okkar mættust einmitt í deildarkeppni á Ítalíu keppnistímabilið 2020-2021. Við bjóðum Sofia hjartanlega velkomna til liðs við Njarðvík og hlökkum til að sja hana með stelpunum í baráttunni sem framundan er.
„Þegar ljóst var að Pau yrði lengi frá fórum við að skanna markaðinn aðeins vegna skorts á sentimetrum en markaðurinn er vægast sagt erfiður á þessum árstíma. Við vorum að leita að leikmanni sem gæti fittað vel í okkar leikstíl. Hlaupið með okkur, rúllað í boltahindrana leik, frákastað og varist vel. Við teljum Sofia Roma tikka í þessi box og hlökkum til að vinna með henni. Hún og Inga Lea manna miðherjastöðuna en við höfum verið ofboðslega ánægðir með innkomu Ingu Leu sem er einungis 16 ára en hefur sýnt hugrekki og dugnað eftir að hún fór af stað eftir löng og erfið meiðsli. Sofia kemur með reynslu í hópinn. Sofia var í hörku skólaprógrammi í USA, hefur spilað víða og er landsliðsmaður Púertó Ríkó,” sagði Einar Árni Jóhannsson þjálfari Njarðvíkurliðsins.