Sjálfboðaliðar eru bakbeinið í íslensku íþróttastarfi og við í Njarðvík erum lánsöm með þá öflugu aðila sem hafa gefið sig að félaginu í gegnum árin og áratugina. Nýverið gafst stjórn Körfuknattleiksdeildar Njarðvíkur færi á að þakka öflugum liðsmönnum fyrir vel unnin störf.
Ómar Kristjánsson var sérstaklega heiðraður fyrir sín störf í gegnum áratugina og leystur út með blómvendi og árituðum búning frá karlaliðinu. Ómar hefur verið virkur í starfi Körfuknattleiksdeildar svo áratugum skiptir. Hafsteinn Sveinsson formaður deildarinnar sagði við umfn.is að sjálfur hafi hann verið í kringum starfið til fjölda ára „en alltaf hitti maður Ómar uppi í íþróttahúsi tveimur tímum fyrir leik að gera og græja.“
Hafsteinn kvaðst mjög glaður að hafa hitt Ómar á leik fyrr í vetur en Ómar hefur verið að glíma við veikindi. „Manni hefur fundist vanta eitthvað þegar maður hittir ekki á Ómar fyrir leiki því var ég mjög glaður að sjá hann óvænt á leik fyrr í vetur. Þetta er nefnilega ekki bara körfubolti, þetta er fjölskylda.”
Fleiri sjálfboðaliðar sem vinna að uppsetningu, öryggisgæslu og frágangi við leiki Njarðvíkurliðanna voru líka heiðraðir og leystir út með blómum að gjöf.
Takk fyrir ykkar öflugu og einlægu störf fyrir Njarðvík.
Fyrir fánann og UMFN!
