Grindavík/Njarðvík hefur samið við tvo nýja leikmenn fyrir komandi átök í Bestu deild kvenna.
Leikmennirnir eru þær Hannah McLaughlin og Maci Teater, en báðar koma þær til okkar frá Vanderbilt University.
Hannah:
Hannah er 22 ára miðvörður sem útskrifaðist í fyrra frá Vanderbilt University.
Hannah lék með Vanderbilt í fjögur ár í hinni sterku SEC deild í bandaríska háskólaboltanum en liðið vann deildina í fyrra þar sem hún var einn af fyrirliðum liðsins.
Þetta er hennar fyrsta skref í atvinnumennsku og við hlökkum til að fylgjast með henni í sumar.
Gylfi Tryggvason þjálfari liðsins hafði þetta að segja um Hannah: „Hannah er frábær varnarmaður með góðan leikskilning og staðsetningar og virkilega fær með boltann. Hún er mikill leiðtogi og frábær karakter sem mun reynast okkur vel í sumar.“
Maci:
Maci er 22 ára gömul og hóf háskólagöngu sína með hinum virta skóla North Carolina þar sem hún var í tvö ár. Seinni tvö árin spilaði hún með Vanderbilt University þaðan sem hún útskrifaðist í fyrra.
Maci er mikill leiðtogi innan sem utan vallar og var einn af fyrirliðum Vanderbilt liðsins sem vann SEC deildina í fyrra.
Gylfi Tryggvason þjálfari liðsins hafði þetta að segja um skiptin: „Maci er tæknilega öflug, fer vel með boltann og er með góða sendingagetu. Hún er grjóthörð í návígjum og sterkur karakter. Hún er akkúrat sú tegund af leikmanni og liðsfélaga sem við vorum að leitast eftir.“
Knattspyrnudeildir Grindavíkur og Njarðvíkur bjóða Hannah og Maci innilega velkomna í liðið og hlakkar til að sjá þær í Bestu deildinni með liðinu í sumar!