Ungmennafélag Njarðvíkur fagnar 80 ára afmæli á árinu. Á slíkum tímamótum er vert að líta um öxl og fara yfir það gríðarlega mikla og góða starf sem innt hefur verið af hendi. Af því tilefni ætlum við að halda daginn hátíðlegan í kringum fyrsta leikinn í úrslitakeppni karla í körfubolta sem fram fer á morgun 10. apríl, á sjálfan afmælisdag Ungmennafélags Njarðvíkur.
Afmælisárinu verður svo aftur gert hátt undir höfði síðar á árinu þegar við fáum afhent nýtt og glæsilegt Íþróttahús sem verður eitt flottasta körfuboltahús landsins. Við höfum beðið lengi eftir því að fá það hús en framkvæmdir hafa tafist alltof lengi en það má segja að það sé vel við hæfi að fá afhenda slíka lyftistöng á 80 ára afmælisárinu okkar.
Fyrir 10 árum síðan gaf félagið út glæsilegt afmælisrit sem spannar yfir sögu félagsins frá 1944 til 2014. Það rit er til á rafrænu formi hér Ég hvet alla Njarðvíkinga til að kynna sér þetta rit sem geymir ómetanlega heimild um Ungmennafélag Njarðvíkur.
Mikill vöxtur er í félaginu en í dag eru tveir starfsmenn í fullu starfi sem sjá um daglegan rekstur og aðstoða deildir félagsins eftir því sem við á. Sífellt meiri kröfur eru lagðar á starfsemi íþróttafélaga sem verður til þess að sjálfboðaliðar endast styttra í hlutverkum sínum og tíðari breytingar eru á stjórn félagsins og deilda. Við í Njarðvík teljum okkur engu að síður búa yfir sérstöðu hvað sjálfboðaliða varðar, starfsemi félagsins væri hvorki fugl né fiskur án fórnfýsi og eljusemi þeirra fjölmörgu sjálfboðaliða sem komið hafa að starfi bæði fyrir deildir og félagið í heild.
Finna má allar upplýsingar varðandi starfsemi félagsins á heimasíðunni okkar UMFN.is
Til hamingju með afmælið kæru Njarðvíkingar nær og fjær.
Fyrir fánann og UMFN!
Ólafur Eyjólfsson
formaður UMFN
