Shooting Club búðirnar, haldnar í samstarfi við Njarðvík í Icemar höllinni, voru aftur haldnar með góðum árangri. Annað árið í röð var fullt í búðirnar og mæting var mjög góð – bæði frá iðkendum félagsins og einnig fjölda annarra félaga víðs vegar að. Sumir iðkendur lögðu jafnvel langa leið utan af landi til að sækja búðirnar.
Flottir gestir mættu og hittu leikmennina – það var meistaraþema á gestalista þar sem á meðal þeirra voru Helena Rafnsdóttir, sem varð Íslandsmeistari með Njarðvík síðastliðið vor, Thelma Dís Ágústdóttir bikarmeistari með Keflavíkingum í vetur, og Ólafur Ólafsson fyrirliði Íslandsmeistaraliðs Grindavíkur. Að auki komu fjölmargir gestaþjálfarar við sögu í þessum þriggja daga búðum, bæði erlendir og innlendir, sem buðu þátttakendum upp á einstakt tækifæri til að læra og þroskast.
Stefnt er að halda hefðinni áfram og bjóða upp á búðirnar í þriðja sinn á næsta ári.
